Klysja- vægt til orða tekið

Ávallt heyrist sami söngurinn úr herbúðum sveitarfélaganna eftir kjarasamningagerð við kennara. Þetta er undirstöðustétt í menntunargeiranum, grunnskólanum sem er skylda. Forsvarsmenn sveitarfélagana eru afskaplega afskiptir þegar kemur að málefnum grunnskólans að kosningabaráttu undantekinni. Þá eru allir á tánum og tala um hve mikilvæg stofnunin sé og hve vel þarf að hlúa að öllum sem að grunnskólanum koma. Hjal svo ekki sé dýpra í árina tekið. Og sorglega staðan margir kaupa þennan söng.

Í þessum kjarasamningi er ekkert sem fær ungt fólk til að ,,flykkjast" í kennaranám en kennaraskortur er nú þegar á landinu og versnar til muna á komandi árum. Þeir sem leggja á sig fimm ára nám til að kenna í grunnskóla fá tvo launaflokka fyrir tveggja ára viðbór sem er upp í nös á ketti. Það kemur í fyrsta lagi lagfæring á þessu vor 2019, TVÖ OG HÁLFT ÁR.

Í þessum kjarasamningi bera kennarar sem hafa 20 ára starfsreynslu og seldu ekki kennsluafsláttinn (minni kennsla, meira af faglegum störfum, ekki afsláttur á vinnuframlagi), skarðan hlut frá borði. Þeir kennarar sem seldu kennsluafsláttinn og hafa 20 ára kennslureynslu fá einn launaflokk fyrir það. Hér er um gróflega mismunun að ræða á reynslu kennara. Menn binda launaflokkinn við að eftir á hafi mönnum þótt söluákvæðið ekki nógu dýru verði keypt, en það vissu allir áður en gengið var til atkvæðagreiðslu á þeim kjarasamningi. Nú á að bæta þeim það upp svona eftir á og margir kennarar líta á það sem þvingunaraðgerð af hálfu sveitarfélaganna til að fá afganginn af kennurum til að selja. Það eitt bendir til þess að kennarar hafa látið í burtu mjög mikilvæg réttindi sem er þyrnir í augum sveitarfélaganna og þeir sem seldu borguðu eigin hækkun á sínum tíma. Sú sorglega staðreynd að ákveðin sveitarfélög hafa bannað skólastjórum að nota ,,afsláttarkennarana" í yfirvinnu er með eindæmum. Þeir kennarar skila sama vinnuframlagi og aðrir og því er þetta gróf mismunun. Hef ávallt vanist því að yfirvinnu eigi að skiptast sem jafnast á milli starfsmanna.

Ég trúi því ekki að þessi kjarasamningur kosti sveitarfélögin eins og formaðurinn samninganefndar talar um. Hugsið um mikilvægi menntunar, fjölgun leiðbeinenda í grunnskólum og þann kennaraskort sem verður viðvarandi á komandi árum. Bætið í þannig að ungt fólk sjái ástæðu til að mennta sig innan geirans.

Tómarúm eftir samninginn