Varð formanni Félags grunnskólakennara á í messunni

Margir hafa undrast orð formanns Félags grunnskólakennara um kröfu kennara, milljón á mánuði. Menn velta fyrir sér hvort það hafi verið ásetningur hennar að segja þetta eða bara hrokkið upp úr henni. Mjöll er ekki vön að koma fram í fjölmiðlum og því gæti streitan haft áhrif.

Ekki bara að menn undrist, heldur spyrja líka af hverju ættu kennarar að fá milljón á mánuði. Hvar eiga sveitarfélögin að fá peninga? Ríkið, það á að hjálpa til. Skerðing lífeyrisréttinda var líka ríkisins. Og hvað gera sveitarfélögin þegar þeim vantar peninga, hækka skatta á íbúa. Nú nýverið var ákveðið að fæða öll börn sveitafélaganna og það kostar. Jafnvel sveitarfélög sem eru í taprekstri urðu að taka máltíðirnar á sig. Líka fyrir fólk sem hefur efni á að gefa börnum sínum að borða.

Eftir að Mjöll Matthíasdóttir lét þetta út úr sér með milljónina velta menn veikindarétti kennara og annarra opinberra starfsmanna fyrir sér. Sett í samhengi við almennan markaðinn en markmiðið var að jafna launin á milli markaða. Veikindaréttur opinberra starfsmanna er mun betri en fólks á almenna markaðnum. Á að jafna hann? Er það ekki réttlátt nú þegar krafan er að allt annað sé jafnað spyrja menn.

Verði kennari, sem kennt hefur í 18 ár, veikur á hann rétt á 12 mánaða launagreiðslum og 6 mánaða greiðslu úr sjúkrasjóði KÍ. Verði félagsmaður VR veikur, með sama starfsaldur, fær hann 6 mánuði á launum og 5 mánuði úr sjúkrasjóði stéttarfélagsins. Mismunun, já það finnst mörgum. Réttlátt segja ríkisstarfsmenn sem hafa sætt sig við lægri laun í áratugi.

KÍ skrifaði undir samkomulagið þrátt fyrir að ekkert hafi verið fast í hendi. Það er ljóst samninganefnd KÍ getur ekki bakkað með kröfuna um milljón á mánuði nema niðurlægja sig og stéttina með. Sennilega væri 100 þúsund til eða frá ekki tiltökumál, en að ganga frá samningaborði án þess að ná 80-85% af kröfunni, sem Mjöll talaði, yrði niðurlæging.

Rætt er um hvort kennarar eigi að grípa tækifærið og samþykkja breytingu á kjarasamningi og jafnframt að lengja skólaárið. Öllum er ljóst að fleiri og fleiri lenda í vandræðum með börn sín á meðan skólinn er lokaður yfir sumartímann. Kennarar geta selt sveitarfélögunum menntunarkaflann sem kveður á um að endurmenntun kennara skal vera 100 tímar á ári. Kennarar seldu kennsluafsláttinn, svo þeim er ekkert heilagt.

Vangaveltur manna eru margvíslegar, enda kjaramála kennara ekkert launungarmál.