Hvað gerist ef barninu þínu er rænt?

Maður vill auðvitað trúa því að kerfið grípi þig í þessum hræðilegu aðstæðum og komi því strax í gagnið að koma barninu heim.

Það er því miður ekki staðan.

28. desember var drengnum okkar rænt af landinu. Hvert vitum við ekki, hvernig hann hefur það vitum við ekki eða nokkuð annað.

Þetta er í 3ja sinn sem reynt er að fara með barnið frá landinu. Þriðja skipti! Og hvað var gert í hin skiptin?

- Fyrsta skiptið var sumarið 2020. Þá var undirskrift föður fölsuð og því skilað inn til sýslumanns til að fá vegabréf fyrir barnið. Það var stoppað því faðir fær fréttir af þessu.

Hvað var gert? Ekkert! Málið var kært, en ennþá tveimur árum seinna er bara verið að vinna í því... afleiðingarnar, engar.

- Annað skiptið er sumarið 2021. Þá er farið með barnið til Noregs, bréf sent til annars aðila en föður um að hún sé flutt úr landi með börnin. Lögmaður nær henni til baka.

Afleiðingar: Engar!

Í bæði þessi skipti er mál í gangi fyrir dómstólum til að taka á umgengni og tálmun. Hvaða afleiðingar hefur þetta?

Engar.

Þetta hefði ekki átt að koma á óvart og yfirvöld fengu svo margar vísbendingar um hvað væri framundan.

Í allri þessari umræðu um ofbeldi þá má þessi tegund ofbeldis ekki gleymast. Tálmunarofbeldi. Mér finnst það samt ekki nógu sterkt orð.

Það að börnin manns séu rifin í burtu frá manni. Öllum virðist vera sama (allavega kerfinu) og trúa því að faðir hafi nú bara átt þetta skilið á einhvern hátt. Ef manni er trúað þá eru svörin á þá leið að lögin séu nú bara þannig að ekki sé hægt að hjálpa.

Alltaf er ofbeldismanninum (tálmunarmanneskjunni) trúað. Það hlýtur nú að vera einhver ástæða fyrir tálmun.

Ef verið er að tálma föður er trúin, já móðir hlýtur að vera að vernda börnin frá ofbeldi. Ef móðir er tálmuð þá hlýtur hún að vera í neyslu.

Ef þolendur ofbeldisins/tálmunarinnar eru fleiri en eitt foreldri, þá er það sama saga. Allir hljóta þessir menn að vera vondir menn sem verið er að vernda börnin frá og allir eru þeir að ljúga að hafa ekkert gert. Hljómar kunnuglega? Margir þolendur en það hlýtur samt að vera að allir séu þolendur að ljúga og koma höggi á gerandann.

Svarið er bara oft svo mikið einfaldara en það. Hinum megin stendur ofbeldismanneskja sem hefur ekkert annað markmið en að brjóta á hinu foreldrinu. Vilja ekki að barnið sitt eigi aðra fjölskyldu. Það er svo einfalt.

Rétt eins og í öllum öðrum ofbeldismálum þá eru þessi mál gerð eins erfið viðureignar og hægt er í kerfinu. Alls staðar er efast um orð þess sem verður fyrir ofbeldinu, þrátt fyrir að geta sýnt öll gögn sem styðja málið.

Plís - bara plís – hjálpið okkur og hjálpið barninu – það er barnið sem mun á endanum brenna mest fyrir þetta.

 

Status er public og má deila. Tekið frá snjáldursíðu Árnýar Heiðu Helgudóttur.