Kjarasamningur kennara samþykktur

Það fór svo að 2/3 samþykktu nýgerðan kjarasamning kennara og 1/3 hafnaði honum. Ég er ein þeirra sem hafnaði honum m.a. vegna sölunnar á kennsluafslættinum. Vissulega hafa menn val um hvort þeir selji eða ekki. Þessi réttindi komu ekki fyrirhafnarlaust. Kennarar börðust fyrir þeim vegna þess að eldra fólk lýist og þykir oft betra að vera í öðruvísi starfi en beinni kennslu með 22-28 nemendur. Vissulega á sá sem er þrítugur erfitt með að setja sig í spor þess sem er 60 ára í dag...en sá tími kemur. 

Það er ekkert heillandi til þess að vita að margir skólar munu hafa fullorðna kennara eftir ca 10 ár. Það er nefnilega svo þegar aldurinn færist yfir fólk er fátt um fína drætti á vinnumarkaðnum. Ég hallast að þeirri skoðun að launahækkanir á kostnað réttinda séu ekki réttar forsendur, en mér getur skjátlast. Tíminn leiðir það í ljós.

Menntun er lítils metin innan menntunarstéttarinnar. Nám kennara í dag er fimm ára háskólanám og í nýgerðum kjarasamningi eru enn dregin skörp skil á milli gömlu menntunarinnar og tveggja ára mastersprófs. Mér er sagt, af samningamönnum, að ekki náðist í þessari atrennu að semja fyrir fimm ára námið. Finnst það í meira lagi skrýtið, því hér er um grunnmenntun að ræða og breytinga er þörf. Orðræða kennara var á þann veg að hækka þyrfti laun vegna aukinna menntunar og ég taldi víst að ekki yrði gefin eftir tomma hvað það varðar.

Framundan er vinna við leiðavísi um vinnumat. Kennarar samþykktu með kjarasamningnum að hefja slíka vinnu. Líki kennurum ekki vinnumatið munu þeir fella það, hvað gerist þá. Jú þá hefst vinna að nýju við nýtt vinnumat og kennarar með lausan samning á meðan og verða þeir af um 11% launhækkun fyrir vikið. En koma tímar, koma ráð. Tek heilshugar undir með þeim sem segja að þetta var sölutímabil réttinda.

Góðar stundir.